PRISONS YAKERA ,ASHABIKI

MASHABIKI wa Mbeya wamekerwa na kipigo cha bao 1-0 dhidi ya Oljoro JKT kwenye Uwanja wa Sokoine na sasa wanataka kushinikiza wakabidhiwe majukumu na uongozi ili kuepuka fedheha.

Lakini Kocha Msaidizi wa Prisons, Oswald Morris amesema hajui tatizo liko wapi kwa timu yake kwani wachezaji wanajituma lakini mwisho wa siku wanaambulia matokeo mabovu ambayo yamezidi kuwakera
mashabiki wa Mbeya.

Prisons inakamata nafasi ya 13 kati ya timu 14 zinazoshiriki Ligi Kuu Bara baada ya kucheza michezo 12, imeshinda mmoja, imetoka sare tano, imefungwa michezo sita na ina pointi  nane.

Morris ambaye aliwahi kuichezea timu hiyo zamani alisema muda mwingine machozi yanamtoka kwa matokeo wanayoyapata na kuwataka wadau kuwasaidia kujua tatizo la timu yao liko wapi.

“ Inaumiza sana, sijui tatizo liko wapi, timu inacheza katika kiwango cha juu lakini matokeo yanatuhukumu, wachezaji wanapigana mpaka mwisho lakini ndio hivyo, muda mwingine natokwa na machozi kwani sielewi tatizo, naona timu inapotea wakati soka lipo, labda wadau watusaidie kama wameona tatizo ndani ya timu hii ili lirekebishwe na timu irudi katika hali yake,” alisema Morris.

Kabla ya kuanza kwa msimu huu wa ligi, Prisons ilipukutisha mastaa wote wa timu hiyo na kusajili wachezaji wengi chipukizi na baadhi ya mastaa hao waliitabiria timu hiyo kutofika mbali kwa madai waliachwa kwa fitna wakati bado walikuwa na uwezo wa kuibeba timu hiyo.

Timu hiyo imebakiwa na mechi dhidi ya  Rhino Rangers ugenini kabla  ya ngwe ya kwanza ya ligi kumalizika.