MAJUTO ATAMANI KUWA MKULIMA

KING Majuto, mchekeshaji nyota na mkongwe katika tasnia ya filamu Bongo, amefunguka kwa kusema kuwa mazingira ya soko la filamu kwa sasa yanamkatisha tamaa na hivyo kumfanya kila mara afikirie kustaafu na kuhamia katika kilimo.

“Soko la filamu ni gumu na waliolishikilia wana masharti ambayo kwa msanii ni mtihani. Yaani mtu unajikuta unaishi maisha ya kubahatisha wakati una kipaji, ni tofauti na ilivyo kwa wenzetu nje,” alisema.

“Ningepata mfadhili anipatie trekta, hakika ningeenda shamba na kulima kwa nguvu na kuachana na karaha ya kuigiza na kuishi maisha ya kubahatisha. Jamani naomba msaada wa trekta nikajiajiri.”

Majuto anasema kuwa kama atafanikiwa katika mpango wake huo, wala hatakuwa na haja ya kuishi mjini, labda mara moja moja tu kwa ajili ya kufuatilia kazi zake za sanaa.