Kikosi cha Croatia chaahidiwa €500,000

Modrich

Timu ya Croatia imeahidiwa zawadi ya €500,000 na shirikisho la soka nchini humo ikiwa itafanikiwa kufuzu kwa Kombe la Dunia.

Croatia wana kizuizi cha mechi mbili za muondoano, nyumbani na ugenini, dhidi ya Iceland kati yao na kujipatia nafasi ya kucheza fainali za Kombe la Dunia nchini Brazil mwaka ujao. Mechi ya kwanza itachezewa Reykjavik mnamo Ijumaa na ya marudiano Zagreb mnamo Jumanne.

Zawadi hiyo itagawanywa miongoni mwa wachezaji, msemaji wa shirikisho hilo Tomislav Pacak alisema.

Jamhuri hiyo ambazo zamani ilikuwa sehemu ya Yugoslavia ilimaliza nambari mbili kwenye Kundi A la kufuzu nyuma ya Ubelgiji. Hii ni baada yao kutwaa alama moja pekee kutoka kwa mechi zao nne za mwisho, na kuwaacha wakicheza mechi za muondoano.

Matokeo yao bora zaidi katika Kombe la Dunia yalikuwa walipomaliza wa tatu 1998 nchini Ufaransa lakini hawakufanikiwa kufuzu kwa fainali zilizopita nchini Afrika Kusini.