ROSE NDAUKA AAMUA KUACHANA NA UIGIZAJI

Rose Ndauka

MWIGIZAJI wa filamu nchini Rose Ndauka amesema  ameamua kupumzika kwa kipindi cha mwaka mmoja kufanya filamu ili ajitathmini.

Akizungumza na gazeti la michezo hapa inchini la  Mwanaspoti, Ndauka alisema wazo hilo limetokana na tatizo la kufanya kazi zinazojirudia mara kwa mara, hali iliyosababisha aamue kujipa likizo ya muda ili kujipanga.

“Nimeamua kupumzika kwa kipindi cha mwaka mmoja, sitafanya filamu wala sitakuwa ndani ya tasnia hii. Uamuzi huo nimefanya mwenyewe kwa mawazo yangu na wala sijashawishiwa na mtu yeyote na nimepata msukumo baada ya kuona hakuna kitu kipya ninachofanya.”

Rose Ndauka mwenye mchumba kwa sasa alifafanua kuwa bado ana kazi nyingi alizozifanya na bado hazijapelekwa sokoni.

“Ninataka nifanye kitu kizuri kwa Watanzania, nasimama kwa muda, lakini nina kazi nyingi ambazo bado hazijatoka hizi nitaziachia kwa kipindi hiki cha mwaka mmoja, kwani tatizo kubwa kwa wale wanaoona wanauza hawataki kubadilika kila siku wanakuja na kitu kile ile.”