SIMBA YAMSAJILI BONGE LA BEKI

Simba imefikia uamuzi huo baada ya mapendekezo ya kocha wao mpya, Mcroatia Zdravok Logarusic, ambaye aliambia Mwanaspoti kuwa ameutaka uongozi usajili kipa, beki wa kati na ikiwezekana mshambuliaji.

Mwanaspoti ilizungumza kwa simu na Musoti aliyejiunga na Gor Mahia mwaka 2011 akitokea Nairobi City ambaye alisema: “Ni kweli tumezungumza, lakini bado sijasaini nafikiri muda wowote mambo yakienda sawa tutamalizana, kwa sasa nawasubiri wao tu.”

Musoti ambaye alikuwa akiendesha gari wakati anazungumza na Mwanaspoti, alimpa simu mkewe, Lilian kwa ajili ya ufafanuzi zaidi: “Ongea na huyu (mkewe),” alisema Musoti.

Naye, Lilian alisema: “Iko hivi, bado hajasaini, makubaliano tayari na tunawasubiri wenyewe kwa ajili ya kumalizana kabisa.”

“Tunataka mambo yakamilike kabisa na ndiyo tutaweza kuzungumza kwa undani zaidi, si unajua huyu alikuwa na Gor Mahia,”alifafanua, Lilian.

Kuhusu Ivo ambaye yupo nchini Kenya na kikosi cha Kilimanjaro Stars kwenye michuano ya Chalenji yeye alizungumza na gazeti hili jana mchana na alisema: “Niliambiwa leo hii (jana) kuwa ningesaini, lakini hadi sasa bado sijawaona, naendelea kusubiri na nafikiri muda wowote mambo yanaweza kwenda kama tulivyokubaliana.”

Mbali na kuzungumza na kipa huyo, Mwanaspoti pia lilikutana na Katibu Mkuu wa Simba, Evodius Mtawala jana usiku jijini Nairobi ambaye licha ya taarifa ambazo Mwanaspoti ilizipata lakini aligoma kuzungumzia usajili huo.

Awali, Logarusic alisema kuwa amechagua wachezaji kutoka Kenya kwa sababu anawajua baada ya kufanya nao kazi alipokuwa anaifundisha Gor Mahia.

Logarusic alisema: “Nahitaji wachezaji watatu kwa nafasi ya kipa, beki wa kati na kama kutakuwa na ulazima sana, asajiliwe pia mshambuliaji.

“Kati ya wachezaji hao, Ivo ni mmoja wao na mimi ndiye nimependekeza asajiliwe ingawa kulikuwa na makipa wengine zaidi kama kumsajili yeye itashindikana.”

Alipoulizwa mapungufu ameyajuaje wakati Simba ina mshambuliaji, Tambwe Amissi na beki wa kati Gilbert Kaze, kutoka Burundi na beki wa kati, Joseph Owino kutoka Uganda, Logarusic alisema: “Ni kweli bado sijawaona na ndiyo maana nasisitiza nahitaji kuwaona na kuwafahamu zaidi. Mapendekezo yangu ni kwa sababu ya kuhakikisha Simba inafanikiwa.”

Katika kikosi cha Gor Mahia, Musoti hucheza sambamba na Ivan Anguyo au Edwin Lavatsa wakati golini hucheza kati ya Jerim Onyango au Ivo Mapunda akiwa Simba huenda akashirikiana na kati ya Owino au Kaze au hata Hassan Hatibu anayeibukia katika safu ya ulinzi wa kati.

Wakati Ligi Kuu Bara ikiwa imesimama kwa sasa baada ya mzunguko wa kwanza, Simba inashika nafasi ya nne kwa kuwa na pointi 24, pointi nne nyuma ya vinara Yanga, huku nafasi ya pili ikishikwa na Azam na pointi zake 27 sawa na Mbeya City iliyo nafasi ya tatu.