RONALDO AIDENGULIA FIFA

STAA wa Real Madrid, Cristiano Ronaldo, amedai hana uhakika wa kuhudhuria shughuli ya Tuzo ya Mwanasoka Bora wa Dunia itakayofanyika Zurich Januari mwakani.

Hivi karibuni, Ronaldo aliingia katika vita kali ya maneno na Rais wa Shirikisho la Kimataifa la Soka (Fifa), Sepp Blatter, baada ya Blatter kudai kwamba Ronaldo anatumia muda mwingi kujiremba kuliko ilivyo kwa hasimu wake, Lionel Messi wa Barcelona.

Baadaye, Blatter aliomba msamaha kufuatia kauli hiyo aliyoitoa wakati akihutubia katika Chuo cha Oxford nchini Uingereza, lakini Ronaldo anaonekana bado kutokuwa radhi na msamaha huo wa Blatter ambaye anaonekana kumpendelea zaidi Messi.

“Bado tuna siku kadhaa kabla ya tukio hilo, tutaliongelea jambo hilo na tutaona kitakachofuata. Bado nina matumaini ya kushinda mataji mengi, lakini tunaliangalia hilo kwa pamoja na klabu,” aliongeza nyota huyo Mreno.